12 май оқшомида Португалия пойтахти Лиссабонда “Евровидение” қўшиқ танловининг финал босқичи бўлиб ўтади. Танловнинг финал босқичида 26 давлатдан қўшиқчилар қатнашади.
Бу йилги танловда Норвегия, Нидерландия ва Исроилдан келган қўшиқчилар асосий фаворит сифатида кўрилмоқда.
Собиқ совет ўлкалари орасида Молдова ва Украина қўшиқ танловининг финалига чиқди.
Россия 2000 йилдан буён бу йил илк бор "Евровидение"нинг финал босқичига ўтолмади.
Ўтган йили Украинанинг Киев шаҳрида бўлиб ўтган “Евровидение” қўшиқ танловида португалиялик Салвадор Собралнинг ғолиб бўлгани учун бу йилги танловга мезбонлик ҳуқуқини Лиссабон қўлга киритди.
Бу йилги танловда ғолиб Европа шимолидан келган қўшиқчилар орасидан чиқиши кутиляпти.
Фаворитлар орасида норвегиялик Александр Рыбак ҳам бор.
Рыбак 2009 йилда Россияда бўлган Евровидение танловида ғолиб чиққан.
Бу йил у "That's how you write a song" қўшиғи билан тўққиз йил аввалги муваффақиятини такрорламоқчи.
Россияни бу йилги қўшиқ танловида Юлия Самойлова тамсил этаётганди.
Лекин, Самойлова танловнинг финалига ўтолмади.
Ёшлигидан ногирон бўлган Самойлова Россия аннексия қилган Қрим ярим оролида Украина ҳукуматининг рухсатисиз концерт бергани учун ўтган йил Украинага киритилмаган ва Киевда бўлган "Евровидение" танловида қатнашолмаган эди.
Португалияда бу йил ўтаётган қўшиқ танловининг финал босқичига собиқ совет ўлкаларидан фақат Молдова ва Украина чиқди.
Украинани бу йил Меловин, Молдовани эса Do-Re-Dos гуруҳи тамсил этмоқда.
Украина ва Молдовадан ташқари Албания, Сербия, Чехия, Сан-Марино, Швеция, Нидерландия, Норвегия, Исроил, Литва, Исроил, Эстония, Болгария, Австрия, Финляндия, Ирландия, Кипр ҳам танловнинг финал босқичига ўтди.
"Евровидение"ни ташкил қилган ва асосий ҳомийлари бўлган беш давлат- Германия, Франция, Британия, Италия ва Испания вакиллари эса финалда танловсиз иштирок этишади.
Қоидага кўра, қайси мамлакат қўшиқчиси "Евровидение" танловида ғолиб чиқса келгуси йилдаги танловга шу мамлакат мезбонлик қилади.
1956 йилдан буён ҳар йили ўтказиб келинадиган қўшиқ танловида Европанинг 46 давлатидан қўшиқчилар қатнашади.
